Travelers Cycling е веб апликација која е наменета пред се за сите велосипедисти и љубители на велосипедот, како и за сите оние кои поседуваат велосипед, и го користат истиот во секојдневието. Апликацијата е целосно непрофитабилна и единствена цел и е да ги мотивира луѓето што повеќе да го користат велосипедот како превозно средство, со што би се зголемила сообраќајната култура, би се намалил сообраќајниот метеж по улиците, а како резултат на тоа би се намалило и самото загадување на воздухот.
Придобивки од велосипедизмот имаат сите, не само оние кои возат, туку и оние кои се наоѓаат во своите домови, дишејќи почист воздух благодарение на совесните граѓани кои за превозно средство го одбрале велосипедот.
Со мотивирањето на луѓето, бројот на велосипедисти на улиците секојдневно би се зголемувал, а со тоа и потребата од подобрена и побројна велосипедска инфраструктура би се зголемила. Со тоа градските власти би биле приморани се повеќе да инвестираат во велосипедската инфраструктура, со што би им се овозможило полесно движење на велосипедистите.
Ние сме група вљубеници во велосипедизмот, и со секојдневното користење на истиот, дојдовме до идеја да им помогнеме на останатите велосипедисти полесно да стигнат до посакуваната цел, наоѓајќи ја патека која најмногу им одговара, како и најблискиот паркинг за велосипеди до нивната крајна дестинација.
На апликацијата ќе се споделуваат и информации од други велосипедисти кои сметаме дека би биле корисни. Доколку поседувате вакви информации, Ве охрабруваме, во делот Контакт да не контактирате со цел истата да ја споделиме со останатите.
На Travelers Cycling можете да најдете информации за велосипедските патеки во градовите низ Македонија. Со клик на самата патека, добивате информации за правецот на патеката. Со оваа функционалност би можеле да ја пронајдете најдобрата рута за движење, со цел најбрзо и најбезбедно да стигнете до посакуваната дестинација.
Исто така, на апликацијата можат да се најдат и паркинг местата наменети за велосипеди. Со клик на паркинг местото на мапата, ќе добиете дополнителни информации за тоа паркинг место, како што се, име на паркинг просторот и максимален капацитет. Со обележаните паркинг простори можете да го најдете најблиското паркинг место до посакуваната цел.
На апликацијата се додадени и локации на воздушни пумпи, како дел од јавните простори за сервис, како и бензиските пумпи кои поседуваат воздушна пумпа. Ова ќе им помогне на велосипедистите со послаба гума да ја пронајдат најблиската воздушна пумпа, со цел безбедно да стигнат до својата дестинација
Во иднина следуваат и други функционалности, затоа следете не постојано на веб апликацијата, и на социјалните мрежи Facebook и Instagram
Рекламирањето на Travelers Cycling е бесплатно. За да бидете рекламирани на апликацијата, потребно е само да имате завршено одреден проект, со кој би се мотивирале граѓаните да го користат велосипедот, да вршите промоција на велосипедизмот, или да имате инвестирано во инфраструктура со која би им го олесниле движењето на велосипедистите.
Доколку сте правно лице, кафиќ, бутик, фризерски салон, фирма, институција и сл. и имате обезбедено паркинг место, Ве молиме да не известите со цел да добиете бесплатна реклама. Типот и позицијата на рекламата зависат од висината на инвестицијата (најдобри позиции добиваат компаниите со најголема инвестиција).
Бесплатна реклама би добиле и сите велосипедски сервиси и продавници за велосипеди и велосипедска опрема, со цел да им се помогне на велосипедистите во случај на отежнато движење, најбрзо да стигнат до сервис / продавница за велосипеди и велосипедски опреми.
|
